img
img

Yangiliklar

img
Markaz

KOICA Ўзбекистонда миллий малака тизимини ривожлантиришга алоҳида эътибор қаратмоқда

KOICA Ўзбекистонда миллий малака тизимини ривожлантиришга алоҳида эътибор қаратмоқда

Ўзбекистонда барча таълим тизимида фаолият юритаётган ўқитувчи ва мураббийлар малакасини оширишга алоҳида эътибор қаратилмоқда.

Авваллари марказ ўқитувчилари хориж давлатларига, хусусан, Кореяга бориб тажриба алмашиб келган. Бугун мамлакатимизда касбга тайёрлаш марказлари ташкил этилган. Бундан ташқари, миллий малака марказлари ҳамда техник малакани баҳолаш ва ўқитувчилар салоҳиятини оширишга ихтисослашган институт очилиши кўзда тутилмоқда.

Шу муносабат билан Тошкент шаҳридаги Касб-ҳунарга ўқитиш марказида 27 июль куни малака тизими ва миллий стандартлар ишчи гуруҳининг 2-босқич йиғилиши бўлиб ўтди.

Анжуманда Корея халқаро ҳамкорлик агентлиги – KOICA томонидан амалга оширилаётган “Урганч касб-ҳунарга ўқитиш марказини ташкил этиш, миллий малака синовлари ва сертификатлаштириш тизими салоҳиятини кучайтириш ҳамда Ўзбекистонда ўқитувчилар малакасини ошириш марказини ташкил этиш” лойиҳаси мазмуни атрофлича кўриб чиқилди.

Малакавий тизимни лойиҳалаш, ишлаб чиқилган миллий малака марказидан фойдаланиш, жумладан, таълим, малака, саноат ходимлари малакасини ошириш масалалари қизғин муҳокама қилинди.

Қайд этилишича, тўртта йўналиш – автомобилсозлик, электрик, пайвандлаш ва ҳар бир ҳудуд кесимида муҳим соҳалар қамраб олинган. Масалан, Урганчда меҳмонхона ва туризм соҳасини ривожлантиришга алоҳида эътибор қаратилади. Урганч лойиҳасини амалга ошириш муддати 2021-2024 йилларга мўлжалланган. Мазкур лойиҳа доирасида Тошкент шаҳридаги марказ ҳудудида миллий техник малакани баҳолаш ҳамда таълим усталарини малакасини ошириш марказини барпо этиш режалаштирилган.

– 2019 йил мамлакатимизда биринчи марта миллий малака тизими тушунчаси кенг татбиқ этила бошлади, ўшанда илк қадам қўйилганди, дейиш мумкин, – дейди Бандлик ва меҳнат муносабатлари вазирлиги Миллий малака тизимини мувофиқлаштириш бошқармаси бошлиғи ўринбосари Одил Комилжонов. – Асосий мақсадимиз Ўзбекистон фуқароларини халқаро меҳнат бозоридаги иштирокини фаол таъминлаш. Ишчи кучи рақобатдошлигини ошириш ҳар қачонгидан ҳам муҳим.

Тадбир давомида иишчи гуруҳ фаолияти тўғрисида айрим маълумотлар бериб ўтилди. Ўзбекистонда миллий малака маркази тизимини ривожлантириш ва техник малакани баҳолаш дастурини изчил йўлга қўйишга кўмаклашиш лойиҳанинг асосий қисми экани таъкидланди.

Шунингдек, KOICA лойиҳаси доирасида Урганч шаҳрида ташкил этилаётган Касб-ҳунарга ўқитиш марказининг “Йўл харитаси” фаолияти юзасидан ўзаро фикр алмашилди.

Бандлик ва меҳнат муносабатлари вазирлиги тизимидаги касбга ўқитиш марказлари ўқитувчиларини малакасини ошириш мақсадида ташкил этилаётган ушбу янги тизим соҳадаги кадрларни ҳар томонлама малакасини оширишга хизмат қилади. Шунингдек, малакани баҳолаш маркази орқали касбга тайёрлаш марказларини тамомлаган мутахассислар кўникмаси ҳам баҳоланади. Бу борада Корея тажрибасини ўрганиш ва улардан кўмак олиш муҳим аҳамиятга эга.

Маълум қилинишича, 2024 йил Тошкент Касб-ҳунарга ўқитиш маркази ҳудудида малакани баҳолаш тизими ва ўқитувчилар малакасини ошириш институти қуриб фойдаланишга топширилади.

– Бандлик ва меҳнат муносабатлари вазирлиги KOICА ташкилоти билан самарали ҳамкорлик қилиб келмоқда, – деди Ўзбекистон Сертификатлаштириш тизимини яратишни қўллаб-қувватлаш гуруҳи раҳбари Пак Ке Ён. – Биринчи ишчи гуруҳ йиғилишида малакани баҳолаш марказини йўлга қўйиш билан боғлиқ вазифалар белгилаб олинган эди. Ишлаб чиқилган ҳужжат малака тизимини баҳолашда халқаро тажрибани, жумладан, Корея Республикаси стандартига мослаштириш каби асосий мезонларни ўз ичига олади.

Эслатиб ўтамиз, лойиҳа доирасида Тошкент, Самарқанд, Шаҳрисабз ва Фарғонада Касб-ҳунарга ўқитиш марказлари ташкил этилган. Муассасада минглаб фуқаролар касбга ўқитиляпти, кейинчалик иш билан таъминланади. 2023 йилда Урганчда ҳам ана шундай марказ очилиши режалаштирилган.

Мулоқот чоғида техник малакани баҳолаш ва ўқитувчилар малакасини ошириш марказини ташкил этиш, унинг таркибий тузилмалари ҳақида батафсил маълумот берилди.

Кореяда миллий малака марказидан фойдаланиш ва малаканинг умумий тушунчаси, Ўзбекистон меҳнат бозори тадқиқот институтининг малака ва стандартлар бўйича ўрни, Ўзбекистон малакани баҳолаш марказининг тегишли йўналишларига оид тақдимотлар қилинди.

Таъкидланишича, 2022 йил август ойида Ўзбекистон ва Корея тест тўловларини белгилаш усулларини таққослаш устида иш олиб борилади.

Йиғилиш сўнгида ишчи гуруҳ аъзолари, тегишли вазирлик ва идоралар мазкур лойиҳа доирасида барча зарур чоралар кўрилишини маълум қилди.

Onlayn xizmatimizga obuna bo'ling